أساطير البروتين في عالم التغذية

طيب نتكلم عن اكبر صداع بيقابلنا في موضوع النظام النباتي: البروتين.
عارف اتكلمنا فيه قبل كده بس في ناس كتير بتشكك و بيبقى كلامها شكله علمي لكن للاسف مش صحيح على الاطلاق.
فيه اسطورتين:
[*]ان النظام النباتي مافيهوش بروتين كفاية و دي مقدور عليها و جاوبنا عليها كتير و حنجاوب عليها برضة النهاردة.
[*]اننا خايفين من نقص البروتين و اننا ما ناكلش بروتين كفاية. و دي يا جماعة اكبر خدعة في عالم التغذية.

تعالوا نشوف تاريخيا موضوع احتياجاتنا من البروتين اتحدد ازاي.

في تلات طرق لتحديد احتياجات الانسان من البروتين:
[*]ده الطريقة العلمية اللي بنشوفها دلوقتي وهي اننا نحدد اثر البروتين على جسم الانسان
[*]اننا نحد ده من التجارب على الفيران.. و ده مش صح لان ببساطة احتياجات البروتين للفيران اعلى بكتير جدا جدا جدا من الانسان (قارن بين لبن الام الانساني و اللي في الفيران حتلاقي ان لبن الام عندنا يحتوي على نسبة بروتين منخفضة جدا وعند الفيران تقريبا اربع اضعاف) .
[*]و فيه طريقة تالتة لتحديد احتياجات البروتين ودي عمرها اكتر من ميت سنة وللاسف هي اللي اتبنت عليها النظريات بتاعة احتياجاتنا من البروتين.. في القرن ال١٩ فيه عالم تغذية اسمه كارل فون فويت بنى نظريته انه يسأل الناس هما عايزين ياكلوا لحمة قد ايه .. اه و الله .. يعني بنى نظريته على رغبة الناس مش احتياجاتهم. لو على الرغبة الواحد ممكن ياكل نص معزة في اليوم بس دي مش احتياجاتك. وعشان كده قدّر ان احتياجات الانسان البالغ ١٠٠ جرام بروتين في اليوم. وده نزل بعد كده لـ ٠.٨ جرام بروتين لكل كيلو من الوزن.

دكتور كولين كامبل من رواد حركة ال plant based diet اثبت ان المقترح حاليا ان اكلك يبقى ٢٠-٢٥٪ منه بروتين هو سبب الامراض المزمنة دي كلها. انت محتاج ٧-٩٪ بس من اكلك يكون بروتين و ٧-٩٪ يبقى دهون و الباقي كاربوهيدرات.. و الله ما تتخضوش. ما احنا قلنا ان النشويات الصحية مافيهاش مشكلة (رز،كينوا ، قمح و حتى مكرونة)

المهم لما ييجي حد يقولك انت لازم تاكل جردل بروكلي عشان تجيب البروتينات المطلوبة ده مش صح لانه بيبني على النظريات الغلط انك محتاج بروتين كتير.

طيب السؤال: هل ممكن يحصلنا نقص بروتينات او protein deficiency؟
الاجابة لا. 

مافيش علميا او طبيا حاجة اسمها نقص بروتين.. عشان يجيلك تقص بروتين لازم تكون واحد من الحالات دي:

• تبقى من اطفال افريقيا اللي عايشين في مجاعات مرعبة . يعني ولا بتاكل لحمة ولا غيره. و على فكرة مرض نقص البروتين او protein deficiency اتوصف هناك و اسمه Kwashiorkor و دي بتبقى اطفال عندها كرش كبير جدا و اطراف و رفيعة وبيبقوا حالتهم خطيرة جدا. ودول مش بياكلوا حاجة تقريبا الا نشويات مصنعة او سكر او اي شئ يقدروا يحصلوا عليه
  
• تبقى مدمن خمور
  
• ما بتاكلش حاجة غير تفاح مثلا و سكر مصنع
  

كونك يحصلك نقص بروتين ده مش حيحصل لو مجرد اكلت بقوليات وخضار وفاكهة والنشويات اللي قلنا عليها (على فكرة حتى الدرة والقمح فيهم بروتين)

طيب الاسطورة التانية بتاعة ان فيه احماض امينية ناقصة في النبات ولازم تجمع بين اكلات نباتية كتيرة عشان تاخد "البروتين الكامل" ... كلام مش مظبوط.

 حضرتك البقرة اللي بتاخد منها البروتين والغوريلا (اقوى حيوانات الغابة بالنسبة للوزن) والحصان والفيل والزرافة والغزال و و و الخ.. كل دول نباتيين ومش بيروحوا السوبر ماركت عشان ينوعوا احتياجاتهم. مجرد انك كلت الخضار والفاكهة والبقوليات بتاعتك كل يوم من غير ما تقلق دماغك حتاخد البروتين الكافي و زيادة..

انا هنا عايز اشارك معاكم كام مصدر ممكن يبقى مفيد

ده قصة احتياجاتنا من البروتين :
[ندعوك للتسجيل في المنتدى أو التعريف بنفسك لمعاينة هذا الرابط]

و ده شهادة مهمة ل Rich Roll راجل داخل على الخمسين سنة و بيشارك تجربته مش بس كنباتي بس كواحد من اعظم الرياضيين اللي في العالم و من ابطال ال triathlon و في المقال بيشير لرياضيين نباتيين تانيين
[ندعوك للتسجيل في المنتدى أو التعريف بنفسك لمعاينة هذا الرابط]

و ده فيه الرد على موضوع ان النباتات مافيهاش بروتينات زيادة
[ندعوك للتسجيل في المنتدى أو التعريف بنفسك لمعاينة هذا الرابط]

و ده مقالة مهمة لدكتور Dean Ornish واحد من وراد حركة ال plant based diet و اول واحد في سنة ٩٢ يثبت انك ممكن تعالج مرض السكر بمجرد تغيير الاكل. في المقال ده بيشرح ازاي ان البروتينات اللي من الحيوانات ممكن تبقى السبب في الامراض المزمنة اللي بنصاب بيها
[ندعوك للتسجيل في المنتدى أو التعريف بنفسك لمعاينة هذا الرابط]