تفتكروا الزوج لما بيتجوز تاني بيقول إيه في مجالسه السرية؟
تعالي أقولك:
تعرفي إن الزوج لما بيتجوز تاني بيقول إن الزوجة الأولى لها حب العشرة والتانية الحب اللي بجد!
طيب عارفين ليه؟
عشان الزوجة الأولى خدعوها وضللوها عن دورها الأساسي وهو الأنس والحب والمودة والرحمة وعلموها إن دورها خدمة البيت وتربية الأولاد وبس على كده!
الحقيقة إن الزوجة لها دورين في حياتها دور أساسي أولي ودور ثاني وثانوي..
و كذلك الزوج له دور أساسي أولي ودور آخر ثاني وثانوي..
طيب يا ترى بقى إيه هو الدور الأولي الأساسي لكل من الزوجين؟
الدور الأساسي هو "الحب"!
وبكده فالدور الأساسي أن تقوم الزوجة بدور العشيقة وأن يقوم الزوج بدور العشيق
والدور الثاني والثانوي للزوجة هو الإدارة الداخلية للبيت، ويشمل إدارة البيت وتربية الأبناء..
والدور الثاني والثانوي للزوج هو الإدارة الخارجية للبيت، ويشمل الإنفاق على الأسرة وتربية الأبناء..
لما دخلت الزوجة الأولى الزواج كانت حريصة جداً على دورها الثاني الثانوي زي ما علموها وتركت دورها الرئيسي إللي هو "الحب"!
وفي المقابل بقى الزوجة الثانية فهي زوجة فهمت الخدعة واتعلمت من إللي شافته أو إللي مارسته لما كانت زوجة أولى في زواج سابق، فدخلت الجواز التاني وهي تقوم بالدور الصح من الأول!
الزوج لما يتعب من حياته إللي زوجته فيها لا تقوم بدورها الأساسي وتتقن بس الدور الثانوي الثاني بيكون عنده مخرج إنه يروح يعيش قصة الزواج الثاني مع واحدة تانية، بغض النظر كانت فاهمة ولا لأ!
لكن الزوجة الأولى محبوسة بزواجها الأول ولا يوجد عندها بديل سوى القبول بالواقع أوالطلاق!
وفي الآخر بقى إللي بيدفع الثمن في وسط كل الهوس ده هو الأبناء..
ياريت الأزواج والزوجات يجنبونا العذاب ده.
ياريتهم يبتدوا الزواج الأول من أوله وهم عارفين أن الدور الأول لكل واحد منهم هو "الحب"
أقول للزوج:
زوجتك الأولى أيضا تستطيع لعب دور العشيقة بكل حب لو إديتها الفرصة، وبلاش تتلاعب باستقرار البيت والأبناء
وأقول للزوجة:
جوزك عايز يحب ويعشق والحب مش مراهقة ولعب عيال زي ما إنتي فاكره وزي ما علموكي
وأرجوكي بلاش تتعلمي بالطريق الصعب وإنكسار القلب!
خديها مني نصيحه دلوقتي قبل فوات الأوان: "الحب أولاً ثم بقية المسئوليات"
دمتم في حب و استقرار ..
هويدا الدمرداش
المستشارة في العلاقات الأسرية ومؤسس مشروع “The One” لمساعدة الشباب على اختيار شركاء الحياة
الأربعاء نوفمبر 13, 2024 2:57 pm من طرف 
موضوع: الأزواج والدور الأساسي والدور الثانوي