عندك علب زبادى كتير ؟ ما ترميهاش وشوفي ممكن تعملي بيها إيه

عندك علب زبادى كتير ؟ .. ما ترميهاش وشوفي ممكن تعملي بيها إيه





استخدميها للزراعة و زينى بيها شبابيكك او بلاكونتك :

- ادهنى العلب بالدوكو البخاخ .. و زينيها بالستيكرز
- اخرمى قاع العلبة خرم او 2
- روحى لاى مشتل و خليه يحط لك فيها زرعة ( صبار صغير ملون او وردة ) و الجناينى هناك هيفهمك طريقة رعايتها
او روحى كلية الزراعة و اشترى من هناك بذور : بقدونس - نعناع - ريحان ..... الخ
- رصيهم فى صينية او طبق مدور او مستطيل .. او علبة على طبق فنجان قهوة قديم ..... ( علشان المياه اللى هتنزل منهم ما تبهدلش المكان )
و حطيهم على سور البلاكونة او الشباك












استخدميها لتنظيم ادواتك فى الادراج :

- علب الزبادى بتاعتنا فى مصر اللى ليها راس مربعة .. نلزقها تانى فى بعض بمسدس الشمع
- نجمع مجموعة قد مساحة الدرج بتاعنا
و نرص فيها حاجتنا :
* نلف الشرابات و نحطها زى فى الصورة اللى تحت على اليمين
* ماكياج
* ادوات خياطة : كباسين - كبش - ابر - زراير ....الخ
* ادوات مكتبية : دبابيس - برايا - استيكة ......
و هكذا

استخدميها لحفظ الدبابيس :

سواء دبابيس الخياطة او دبابيس الحجاب
- هتحتاجى CD او كارتونة مدورة + قماش + قطن + خيط و ابرة
- هتقصى من القماش قطعتين مدورين قطرهم قد ال CD مرتين تقريبا
- هتخيطى دايرن داير دايرة من القماش بغرزة السراجة و ما تقطعيش الخيط ..
- حطى ال CD فى نص الدايرة القماش ، و فوقه كمية من القطن
- شدى الخيط هتلاقى ان القماشة بتتقفل على ال CD و القطن
- اعقدى الخيط و قصيه
- اعملى نفس الحاجة مع الدايرة القماش التانية
- املى علبة الزبادى بالقطن لغاية ما يبقا القطن بارز خارج العلبة
- حطى فوقها الدايرة التانية من القماش و شدى الخيط علشان القماشة تقفل على العلبة و القطن .. و اعقدى الفتلة و قصيها
- بمسدس الشمع الزقى فتحة القماش اللى حول ال CD فى فتحة القماش اللى حول علبة الزبادى
- زينيها بشريط ستان لتبدو كالقبعة .. و باى حاجة تحبيها ( فصوص - فيونكة - وردة ... الخ )